25.06.2025. UTE Xestión Cangas completou os traballos de renovación, mellora e modernización do depósito de Coiro, unha infraestrutura clave no sistema de subministración de Cangas do Morrazo, por tratarse do depósito de maior tamaño e o encargado de regular e compensar o fluxo de auga entre o encoro de Eiras (Fornelos de Montes-Ponte Caldelas) e o noso concello.
Os traballos principais leváronse a cabo durante toda a noite do xoves 19 de xuño ao venres 20, para poder realizar o corte de subministración sen gran afección á poboación. A reparación completouse correctamente, a pesar de requirir técnicas de soldadura e cambio de pezas baixo a auga. Un equipo de buzos especializados foi o encargado de pechar temporalmente as entradas e saídas de auga desde o interior do depósito, xunto cunha brigada de profesionais da UTE Xestión Cangas.
O proxecto incluíu a substitución das antigas tubaxes por novas de aceiro inoxidable, escollido pola súa durabilidade e alta resistencia á corrosión. A posibilidade de preparar previamente as pezas en taller reduciu os tempos de instalación e facilitou a adaptación ás bridas existentes. As obras tamén incluíron o substitutivo das seis válvulas que controlan a presión e os fluxos da auga.
A auga que nutre o servizo de subministración de Cangas procede, fundamentalmente, do encoro de Eiras, ao outro lado da ría de Vigo, a través dun canal submarino. A rede compénsase e nivélanse as súas presións con un total de 4 depósitos de auga, situados en Piñeiro, Nerga e Ourelo, entre os que destaca o depósito de Coiro polo seu tamaño e emprazamento.
Nas imaxes, exterior do depósito de Coiro (Cangas) e novas instalacións tras a renovación. FOTO: Punto Ga | M.Riopa
